andhralekha
Welcome
Login / Register

లాభాల బాటలో ఆర్.టి.సి : కార్యనిర్వాహక సంచాలకులు డాIIయస్.ఎ.అన్సారీ

 

 

శ్రీకాకుళం,ఏప్రిల్ 11 : ఉద్యోగులందరూ సమిష్టిగా పనిచేసి ఆర్.టి.సిని లాభాల బాటలో నడిపించేందుకు కృషిచేస్తున్నట్లు ఆర్.టి.సి. విజయనగరం జోన్ కార్యనిర్వాహక సంచాలకులు డాIIయస్.ఎ.అన్సారీ పేర్కొన్నారు. బుధవారం ఉదయం ఆర్.టి.సి చీఫ్ ట్రాఫిక్ మేనేజర్ కార్యాలయంలో పాత్రికేయుల సమావేశం జరిగింది. ఈ సందర్భంగా ఆయన మాట్లాడుతూ విజయనగరం జోన్ కార్యనిర్వాహక సంచాలకులుగా ఇటీవలే పదవీ బాధ్యతలు చేపట్టడం జరిగిందన్నారు. శ్రీకాకుళం, విజయనగరం, విశాఖపట్నం, తూర్పుగోదావరి జిల్లాలు ఈ పరిధిలోకి వస్తాయన్నారు. జోన్ పరంగా చూస్తే గతేడాది ఫిబ్రవరి నాటికి రూ.177 కోట్ల నష్టాల్లో ఉందని దాన్ని రూ.77 కోట్లకు తగ్గించి, రూ.100 కోట్ల లాభాల బాటలో ఆర్.టి.సి పయనిస్తుందని చెప్పారు. నష్టాలకు ముగింపు పలికి లాభాలో బాటలో ఆర్.టి.సిని పయనించేందుకు సి.యల్.ఏ.పి (CLOSE LOSSES AIM PROFITS ) అనే నినాదంతో ప్రణాళికను సిద్ధం చేసినట్లు ఆయన చెప్పారు. దీనిద్వారా ప్రయాణీకులకు మరింత దగ్గరగా ఆర్.టి.సిని చేరవేసేందుకు సన్నాహాలు చేస్తున్నట్లు తెలిపారు. ప్రస్తుతం 70 శాతం మంది ప్రయాణీకులు ఆర్.టి.సిలో ప్రయాణించడం జరుగుతుందని, ఆ శాతాన్ని మరింత పెంచేదిశగా చర్యలు చేపట్టడం జరిగిందన్నారు. ఆర్.టి.సి బస్సులలో ప్రయాణం సుఖవంతం, సురక్షితమనే విషయాన్ని ప్రయాణీకులు గుర్తించాలన్నారు. ఆర్.టి.సి బస్సులలో ప్రయాణీకులు ప్రయాణించడం ద్వారా వచ్చే లాభాలను తిరిగి ప్రయాణీకులకే ఖర్చుచేయడం జరుగుతుందని పేర్కొన్నారు. జోన్ అభివృద్ధిలో భాగంగా విజయనగరం, శ్రీకాకుళం జిల్లా పరిధిలోని 55 ఎక్స్ ప్రెస్ బస్సుల ను డీలక్స్, అల్ట్రా డీలక్స్ లుగా అప్ గ్రేడ్ చేయడం జరిగిందని తెలిపారు. ప్రతీ బస్సు స్టేషనులలో మౌలిక వసతులను కల్పిస్తున్నామని, తాగునీరు, మరుగుదొడ్లు, ఫ్యాన్లు వంటి సదుపాయాలు ఇప్పటికే కల్పించడం జరిగిందన్నారు. అంతేకాకుండా వేసవి దృష్ట్యా ఆర్డినరీ బస్సులలో కూల్ మేట్ లను కూడా ఏర్పాటుచేసామని చెప్పారు. జోన్ పరిధిలోని సుమారు 12,050 మంది ఉద్యోగులు ఆర్.టి.సికి సేవలు అందిస్తున్నారని, వారందరినీ ఒకేతాటిపై తీసుకువచ్చి పూర్తిగా నష్టాలను నివారించి లాభాలో బాటలో పయనించేందుకు తామంతా కృషిచేస్తున్నట్లు ఆయన వివరించారు. ఈ సమావేశంలో ప్రాంతీయ మేనేజర్ ఎ.అప్పలరాజు, చీఫ్ ట్రాఫిక్ మేనేజర్ కె.శ్రీనివాసరావు, ప్రజా సంబంధాల అధికారి బి.యల్.పి.రావు తదితరులు పాల్గొన్నారు.

 

జిల్లా పౌర సంబంధాల అధికారి, శ్రీకాకుళం

Post your comment

Comments

Be the first to comment

Related Articles

RSS